Archives

Entrante 1 di aprel 2018 tin un struktura nobo pa ku tarifanan di koriénte. Den e struktura nobo aki tur  konekshon ta bai paga un montante fiho pa luna. Té 1 di aprel 2018 Boneiru tabata konosé solamente un tarifa variabel den kwal e gastunan di e.o. matenshon di e red tabata inkluí. Ku e struktura aki usuarionan di tiki koriente tabata paga muchu mas menos pa e gastunan di e red ku e usuarionan ku tabata usa hopi koriente.

Té 1 di yanüari 2018 koriente tabata kosta $ 0,309 pa kWh (kilowattuur). Pa e lunanan yanüari te ku mart 2018 a subi e prèis ku 24% ($ 0.382 pa kWh). E oumento aki tabata pa Pagabon tambe.

Pa uso di koriente den luna di aprel 2018 kasnan doméstiko lo bai paga temporalmente un tarifa fiho di $ 20,83. Ta kalkulá ku e tarifa fiho aki lo wòrdu oumentá drástikamente entrante 1 di mei 2018. E tarifa pa e koriente usá a keda stipulá na $ 0.2584 pa kWh. E tarifa di Pagabon pa luna di aprel 2018 lo ta $ 0.358 pa kWh. Den e tarifa di Pagabon ta inkluí e tarifa fiho.

Riba e tabèl aki bo por mira kiko e tarifanan nobo ta bai nifiká pabo. E montantenan ta inkluí e tarifa fiho temporal di aprel.

Un kas ku a usa un promedio di 200 kWh pa luna lo a paga den 2017:  200 x $ 0,309= $ 61,80 Ku e tarifa den aprel 2018 esaki lo bira $ 72,52. Esaki ta 17% mas tantu ku den 2017.

Usuarionan di Pagabon lo bai paga den aprel 2018 (sin tene kwenta kwantu nan a usa) 16% mas tantu ku den 2017.

Kasi un quart di e kasnan doméstiko aki na Boneiru ta usa 200 kWh of menos pa luna. Ku e struktura di tarifa nobo aki kasnan doméstiko ku ta usa te 400 kWh pa luna ta bai paga mas tantu.

Na uso di 412 kWh of mas e kwénta lo ta mas abou ku den e struktura bieu.

Riba e gráfiko por nota e diferenshanan den porshentu.

Entrante 1 di aprel 2018 tin un struktura nobo pa ku tarifa di awa. Te ku e fecha menshoná ta tin un struktura progresivo pa ku e tarifanan. Usuarionan ku tabata usa tiki awa tabata paga muchu mas menos ku e usuarionan ku tabata usa hopi awa.

Tur usuario tabata paga un tarifa fiho di $ 7,00 pero si den un luna usa maksimal 4 m³ e tarifa ta bira $ 0.69 pa m³. Pa 4 m³  e faktura lo tabata $ 7,00 mas 4 x $ 0.69 pa un total di $ 9,76. Na uso di 8 m³  e faktura lo tabata $ 7,00 mas 4 x $ 0,69 plus 3 x $ 2,81 plus 1 x $ 4,42 pa un total di $ 22,61.

Entrante 1 di aprel 2018, den e struktura nobo, e tarifanan pa kasnan doméstiko lo bira asina’ki: Tarifa fiho $ 7,00 y tarifa pa m³  $ 3,7638.

Pa 4 m³  den un luna e faktura lo bira: $ 7,00 mas 4 x $ 3,7638. Total $ 22,06.

Den e tabèl aki bo mes por averiguá kiko e tarifanan nobo ta bai nifiká pa bo. Tene kwénta ku e montantenan ta inkluí e tarifa fiho ($ 7,00) pa kasnan doméstiko.

Kasnan doméstiko ku un uso di awa té 13 m³  pa luna ta bai paga mas den e struktura nobo. Pa uso di awa di 14 m³  of mas e usuario ta bai paga menos ku den e struktura bieu.

Den e gráfiko aki bou por mira e diferenshanan di e resibu di awa entrante 1 di aprel 2018 den komparashon ku esnan di 2017

 

Kasnan doméstiko por spar konsiderabelmente riba nan kuenta di koriente. Riba su wepsite y su pagina Facebook, e Union di Konsumidó Boneiru a inisiá ku un kampaña informativo ku tépnan kon spar.

Tép 2. Remplasá peranan di lus  i lampinan di daylight  ku lampinan LED.

Remplaso di un pera di 60 Watt pa iluminashon pafó pa un pera di LED ku un iluminashon komparabel ta duna un ekonomisashon di mas o menos $84,- pa aña.
Remplaso di un TL daylight di 36 Watt pa un pera di LED ta ekonomisá mas o menos $35,- anualmente. E kálkulo aki ta válido segun e tarifanan di WEB for di 1-1-2018.